Si Dayang ma Tampe

Si Dayang, anak tunggalan, bay palꞌngngan ni tampe. Taꞌndaꞌna bagayna amandi ma tahik. Bilahi sidda iya amandi sabab waꞌi baꞌanan bagayna magpandi-pandi ma tahik.

Amoleꞌ ni lumaꞌ si Dayang amaꞌid min inaꞌna amandi ni tahik. Amūng inaꞌna, “Dayang kohap na. Mbal manjari amandi ni tahik bang kohap na sabab tahinang ka duyung.”

Nsaꞌ ameyaꞌ-meyaꞌ si Dayang ma pamūng inaꞌna. Īꞌ magtūy paragan ni tampe patimbul ma kabagayanna supaya makapandi. Kinōgan sigām magbagay-bagay. Inaꞌan na magbeyaꞌ-beyaꞌ sigām maglomba-langi, magpꞌddon-pꞌddonan, maka magtuhun-tuhun ni kalaloman tahik sampay tapikil eꞌ sigām magtilluk-tilluk ma kabangkaꞌan. Landuꞌ sidda kinōgan si Dayang maka kabagayanna.

Patandan na baꞌanan bagay si Dayang. Iya inān masi maglangi-langi, magtuhun-tuhun angꞌlloꞌ batu-batu maka bagguꞌ-bagguꞌ mareyom tahik.

Sōng na sangom lahat nsaꞌ na paꞌin patandan si Dayang min tahik masi na paꞌin iya maglangi-langi sampay magtuhun-tuhun.

Pagꞌndaꞌna sangom na, patandan paꞌin iya. Mbal na makahibal tapeꞌna. Pagꞌndaꞌna aniyaꞌ na sisik ma tapeꞌna sampay ma bittisna. Landuꞌ kinoblaꞌan pangatayan si Dayang. Paꞌagak-agak iya palꞌngngan, mbal na makahibal tapeꞌna apikit na. Si Dayang tuwiꞌ tahinang duyung. Nsaꞌ na makapoleꞌ ni lumaꞌ sigā. Ma tampe hadja na paglahatan. Tammat.

Ai tapah'llingbi pasal itu?

%d bloggers like this: