Usulan ma Pasalan Tohongan

Bay waktu kamattoꞌahan heꞌ, aniya dangan mattoꞌa lꞌlla, balu. Halam aniyaꞌ seheꞌna ma lumaꞌna. Dakayuꞌ llaw anoleꞌ iya ni kapūꞌ-pūꞌan. Pagsoleꞌna paꞌin makabāk iya dakayuꞌ tohongan ati binowa eꞌ na amoleꞌ. Niꞌipat eꞌna pinaheya. Pagubus pilambulan aheya na tohongan.
Dakayuꞌ llaw palꞌngngan mattoꞌa lꞌlla eꞌ, pagpoleꞌna lingatu iya. Halam aniyaꞌ amꞌllahan iya sagōꞌ pagsōdna ni lumaꞌ aniyaꞌ patꞌnnaꞌ ginisan kinakan mainaꞌan. Ainu-inu iya. Pagdaiꞌ-llaw palꞌngngan na isab iya. Pagpoleꞌna buwattēꞌ na paꞌin. Inaꞌan na isab patꞌnnaꞌ pagkakan. Sinōꞌ eꞌna paluwaꞌ sai amatꞌnnaꞌ kinakan hēꞌ sagōꞌ halam aniyaꞌ paluwaꞌ.
Pagꞌllaw dakayuꞌ, patapuk lꞌlla ē’ ma deyom lumaꞌna. Jari angꞌnda iya. Pagꞌndaꞌna ma bay tohongan he’ tahinang ahāp dꞌnda makalanduꞌ. Paragan lꞌlla agtūy boꞌ gapusna dꞌnda inān.
Yuk dꞌnda, “Bbahin aku! Aku itu tohongan.” Sagoꞌ mbal bilahi lꞌlla. Kabilahiꞌanna tahinang hꞌnda eꞌna ya bay tohongan eꞌ. Tinaimaꞌ iya eꞌ dꞌnda inān.
Manjari makapagdakayuꞌ paꞌin sigām, angiram na hꞌndana sampay anganak dakayuꞌ manusiyaꞌ. Anangis anak sigām.
Pagtangisna yuk lꞌlla inān, “Angkan du ka mbal anak tohongan panangis ka!”
Rang,” yuk hꞌndana, “Daꞌa ōnin anakta anak tohongan, sabab bang buwatte’ pabalik aku buwat bay tagnaꞌ.”
Na, palabay pilambulan takalipat na eꞌ lꞌlla ya bay pamissala hꞌndana ma iya. Jari dakayuꞌ llaw anangis anak sigām. Mbal pahondong.
Akagit atay lꞌlla inān ati yukna ma anakna, “Panangis ka sidda anak tohongan!”
Na, akagit atay hꞌndana angkan tahinang agtūy tohongan pabalik ati pakuppa ni tahik. Pakuppa isab lꞌlla angapas sagōꞌ mbal na taꞌabut eꞌna hꞌndana.
Na, anangis na isab anakna. Lingantu na iya. Jari magsuwala tohongan min tahik, yuk-i, “Bang paduruꞌnu anak ilu bowahun ni kalang. Patꞌnnaꞌun mailu sagōꞌ palawak ka min aku.” Patuwaꞌ tohongan eꞌ, tahinang manusiyaꞌ amaduruꞌ anakna. Asso paꞌin anakna, pakuppa dꞌnda pabīng boꞌ tahinang tohongan. Na minnēꞌ angkan aniyaꞌ usulan tohongan itu.

Ai tapah'llingbi pasal itu?