Bahasaku, Bogboganku
Kaꞌanakan, saga anak-anak bahaꞌu ma masa battinaꞌan, halam aniyaꞌ na pagbogbogan ma si Sama magpaheya bissara Sinamahan sigala. Ma waktu kami battinaꞌan, taꞌndaꞌnu kahekaꞌan mga anak landuꞌ salli amūng magbissara ma saddī bahasa. Ya na makasallaꞌ ma sigā, mas kabilahian, niōnan eꞌta magpost ma Facebook app nān, ma bahasa Tagalog na ka atawa English atawa bahasa saddī min Sinama. Ma pasalan itu, pakulang na sadja baꞌanan magusal bahasa kita, Sinama, labi-lubaꞌ na ma baꞌanan ‘millenials’ kaꞌanakan.
Ayyan bahāꞌ parsababan itu?
Apaꞌit nibissara, tilawku seheꞌku angay sigā mas labi salli amūng ma bahasa saddī, minsan magbeyaꞌ magsuli-suli, bang aniyaꞌ bangsa saddī, sigā magparaya mbal amūng magsinama karnaꞌ ma pagaddat ma bangsa atawa lahat saddī.
Bang aku angahati, sigā bahāꞌ aiyaꞌ mūng sadja, atawa maraiꞌ sāb adeyoꞌ pangandaꞌ ma sigā bang magbahasa kami itu. Battingga ni bogbogan Bangsa si Sama atawa Badjao, bang bꞌttitu kahalan manusiyaꞌ mbal na ataꞌu missara ma kapatut bangsa lahat sigā.
Hangkan betēꞌ ma baꞌanan mattoꞌa, subay masi-masi sigala magtarbiya ma anak sigala, anohoꞌ mbal nikaipat ayyan pusakaꞌ kamattoꞌahan, lamud na bahasata Sinama maka baꞌanan bowahan, hāp panggaddatan, na subay tuꞌud nibogbogan, nipakay, nipaheya. Ma waktu battinaꞌan, si indaꞌ-otoꞌ subay angiskul pahāp para tausal taꞌu sigā, magbogbog addat pagkasilasa, addat si Sama, bahasa Sinama, ya na pamanduꞌ pusakaꞌ min mattoꞌa kami.
