Hurupan Sama (Bahagiꞌ 2: Vowels Atahaꞌ)

Ma Hurupan Sama Bahagiꞌ 1 bay aku anulat bang angay subay pinasugpat pronoun ni kabtangan ma bahasa Sinama.  Mbal ajukup pagsulat ilu bang halam aniyaꞌ sulat ma pasalan saga vowel atahaꞌ. Ai saupama vowel atahaꞌ ma bahasata? Aniyaꞌ nnom hekaꞌ vowel ma Sinama (aeiouꞌ), sogoꞌ lima hadja makajari pinatahaꞌ (āēīōū). Bassahun saga kabtangan itu:

ā : sigām, inān, ahāp, bahāꞌ, sigā
ē : pehēꞌ, buwattēꞌ
ī : pabīng, saddī, sīn
ō : ōn, sinōꞌ, pasōd, aningkōꞌ
ū : magtūy, sangpūꞌ, dahū, ahūg

Bay tasabbutku ma sulat dahū inān, ya kamemon kabtangan Sinama subay pinakosog ma vowel karuwana min katapusan.
Sawpama:

Na! Angay ya hurupan ma kabtangan “dahū” maka ma kabtangan “inān” pinakosog ma katapusan vowel? Angkan buwattēꞌ sabab min vowel atahaꞌ ya inaꞌan ma kabtangan.

Contractions

Pikilunbi itu, ma Sinama kaseheꞌan “dahū” itu bang ma Sinama sigām subay “dahulu.” Tandaꞌbi kabtangan “sigām” inān?  Ma Sinama kaseheꞌan subay “sigala” maka “sigalam.”  Ya pasalan kabtangan “inān”, sumaꞌan kitam ahꞌlling ‘inān’, sumaꞌan ‘inaꞌan’.

Itu giꞌ:

Ya kabtangan ‘lān’ ma Sinama saliꞌ du maꞌanana maka kabtangan ‘lalan’ ma bahasa Ilanun.
Ya ōn itu ma linguistics, “contractions.”

contraction [kənˈtrækʃən]

Aniyaꞌ bagayku bay anilaw aku bang ai, “Sai ōnnu?” ma English.  Yukku, “What’s your name?”  Asapat bay panambungku  angkan halam tahatiꞌ eꞌna.  Tahatina paꞌin, saliꞌ iya kabahaꞌuwan.  Bang ma pangannalna subay “What is your name?”  Ya na kōꞌ itu niōnan “contraction” ma bahasa English.  “What is” tahinang “What’s”.  Ya paltandaꞌan contraction itu ma bahasa English, apostrophe.

Na bang buwattitu, hatina tauwaꞌ ya bay panduꞌku, bang ma hurupan Sinama, subay  pinakosog vowel karuwana min katapusan kabtangan.

Bang tabista saga vowel atahaꞌ saliꞌ duwa vowel, angay mbal na sadja sulatta duwa vowel boꞌ mbal alengog?

Minsan saliꞌ labi aluhay sinulat vowel min duwa, ya bꞌnnalna labi ahunit binassa.  Ma saga Kasamahan ma Pilipin, aheka bay anganad amassa bahasa Tagalog.  Ma Tagalog, halam aniyaꞌ vowel atahaꞌ itu.  Angkan bang kitam anulat “amoleꞌ aku gana-gana” ma Tagalog, buwattitu sulatna, “uuwi ako mamaya.”
Bang ma hurupan Tagalog subay buwattitu:

Nggaꞌi ka:

Sogoꞌ magbiddaꞌ Sinama maka Tagalog sabab bang ma hurupan Sinama subay buwattitu:

Nggaꞌi ka:

Ma pasalan itu, bang aniyaꞌ Sama abiyaksa amassa Tagalog, asāꞌ sadja bassahanna bang duwa vowel ya usalna bang sulatna saga vowel atahaꞌ itu.
Angkan pabalikku ya panduꞌku ma panduꞌ dahū inān:

Pagka magbiddaꞌ Sinama maka Tagalog, atawa Sūk, atawa Malayu, subay magbiddaꞌ isab sulatanna.

Mbal tinōp ma bahasata system pagsulat Tagalog atawa Malayu.  Subay usalta system Sinama.

Katapusan

Anambag kam bang kam pauyun atawa mbal.  Bang maguyun kitam ma pasalan system pagsulat Sinama itu, subay pasaplagta system itu ni kasamahan, labi-labi ni saga mastal ma lahat.  Tꞌkkonunbi link ma facebook ma reyoꞌ boꞌ pasaplag itu ni saga bagaybi kasamahan.  Bang kam mbal pauyun ma panduꞌku itu, subay kam amabāꞌ isab boꞌ kataꞌuwanku bang angay.  Paluwasunbi isab bang aniyaꞌ saga panilawbi.
Amanduꞌ aku pasunuꞌ ma pasalan hamsaꞌ  ma bahasa Sinama maka batang-sulatna ( ꞌ ).  Pahatita kam bang angay mbal tinōp batang-sulat “h” atawa batang-sulat “k” ma hamsaꞌ itu.

Bang kam bilahi angencode pahāp ma computer, download-un Sinama Keyboard.

Kauman Sama (69)

Kaseheꞌan sulat min magsusulat itu:

• The Traditional Sama graduation from Quran Studies
• Sama Pagluguꞌ on the night of Maulud
• Saga Kabtangan Pagaddat Educational Poster