Top10 Sama Singers

Maingga-maingga aniyaꞌ saga kauman kasamahan, aniyaꞌ isab saga kalangan Sinama takaleta min radju atawa DVD. Labi-labi bang aniyaꞌ kawin.  Min daiꞌ-llaw sampay tongaꞌ bahangi, makakale kam saga tenes-tenes si Jenes atawa kalangan bahaꞌu min si Den Bisa atawa si Jumadin. Mbal aku ‘expert’ ma pasalan saga kalangan itu sogoꞌ bilahi aku angalista bang sai saga favorite-ku.  Bang aniyaꞌ takalipatku sinabbut boꞌ aku makakale isab min kaꞌam bang sai favorite-bi. Ya itu sababan angkan aku bay angahinang sulat itu: Sinama.org’s Top 10 Magkakalang Bangsa Sama (Top 10 Sama Singers) Magtagnaꞌ aku min umbul sangpūꞌ:

[poll id=”6″]

10. Elbis

Itu aku ma Davao. Alawak kami min Sulu maka Sabah.  Angkan bang aniyaꞌ kawin ma Davao, ma Dadianggas (General Santos), atawa ma Saranggani ahāp si Elbis kinꞌlloꞌ boꞌ mag-keyboard.  Aꞌa Sibutu iya, sogoꞌ atꞌggol iya maglahat ma Tinutuꞌ, Saranggani Province.  Apanday iya mag-keyboard.  Kataꞌuwanna saga kalangan bahaꞌu min lahat, buwat saga kalangan si Den Bisa atawa si Jumadin.  Ataꞌu isab iya angalang saga kalangan ma bahasa Sinama, Maguindanaon, maka Tagalog.

9. C’lok

Dakayuꞌ magkakalang min Skyline.F.M. Records Malaysia.  Ahāp suwalana.  Aniyaꞌ kalanganna alallay maka aniyaꞌ isab rock n’ roll.  Mbal tasiguruku bang mꞌnningga lahatna poꞌon sogoꞌ bang ma tokoranku Sama Tabawan iya.  Itu dakayuꞌ lyric min kalanganna:  “Kasilasata o Dayang, abꞌkkat na ma tongaꞌan. Dayang apꞌddiꞌ pikilan.” Halam giꞌ tandaꞌku DVDna maitu ma Pilipinas sogoꞌ mura-murahan paluwas du isab DVDna maitu.

8. TM Boyz

Aheka kalangan sigām ma Youtube.  Sama Sibutu sigām min Tong Mageng angkan niōnan sigām TM Boyz.  Ma buwattinaꞌan, kahekaꞌan kalangan Sinama paluwaꞌ, min Malaysia.  Angkan akōg aku aniyaꞌ isab saga magkakalang masi maitu ma Pilipinas.  Favoriteku kalangan sigām, “Dꞌnda Taga Tunang.” Pangōnku ma kalangan itu “Aku ma Tōng Pantan.”  Kaseheꞌan kalangan sigām:

• Saliꞌ aku angentom
• Dꞌnda Manisan
• Hinang Baran

7. Dyana

Min Skyline.F.M. isab si Dyana.  Labi ahekaꞌ artist Sama lꞌlla min artist dꞌnda.  Ma buwattinaꞌan abantug si Dyana min saga artist dꞌnda kaseheꞌ.  Sinama Tawi-Tawi bahasana sogoꞌ maglahat iya ma Kota Kinabalu, Sabah.  Aniyaꞌ saga kalanganna maka si Den Bisa:

• Joget Budjang Subul
• Lango-Lango Lasa
• Lolay Pangaddatan

Aniyaꞌ versionna ma “Siksaꞌ Pangentoman.”  Ataꞌu si Dyana angalang, apanday isab iya angigal.

6. Ajis

Bang takalenu ōn Ajis, maraiꞌ tapikilnu magtūy saga kalangan Tagalog buwat, “Halik” atawa “Luha”.  Sogoꞌ si Ajis itu, Sama min  Tabawan  maglahat ma Sabah.  Angalang iya ma bahasa Sinama, bahasa Sūk, maka Malayu.  Ataꞌu toꞌongan iya angigal.  Min Skyline.F.M. du isab iya buwat si Dyana.  Bay aku makabꞌlli DVDna ma Semporna.  Pagtilawku ma lꞌlla magdagang  saga DVD, bang sai ataꞌu angalang min Tabawan, si Ajis ya sambungna.  Itu saga kalanganna ahāp ma bahasa Sinama:

• Manuk Llong-Llong
• Sangbayan Dalling-Dalling
• Bilahi Mareyom Atay
• Halam Aniyaꞌ Suratan
• Pꞌddiꞌ Palasahan

5. Rash

Ahāp kinale saga kalangan si Rash, sogoꞌ bang halam tandaꞌnu videona, kaugun, sabab ataꞌu toꞌongan iya angigal maka ahāp performance-na bang angalang.  Alasig iya bang angalang. Aꞌa min Ubian iya sogoꞌ ma Semporna na maglahat.  Min Skyline.F.M. du isab iya.  Maraiꞌ ya favorite toꞌongan kalanganna min kamemon ya na, “Piꞌil.” Si Rash maka si Den Bisa bay angalang kalangan itu. Saga kalanganna lagiꞌ kaseheꞌ:

• Si Lingkatan
• Sangbay Igal
• Panansang

4. Hainun

Dꞌnda Sibutu si Hainun.  Min tagnaꞌ lagiꞌ sampay ni kabuwattinaꞌanan, abantug asal iya angalang.  Ahunit piniha saga kalanganna ma internet sogoꞌ daiꞌ-daiꞌ du piniha bang ka ma kauman Sama.  Bay aku anilaw bang sai dꞌnda Sama ataꞌu angalang? Ya sambung kamemon, si Hainun umbul dakayuꞌ.  Magsinūk maka magsinama iya ma saga kalanganna. Saga kalanganna ma internet:

• Siraka Mbal Paruliku
• Taluk Bayu (Malayu-Tausug)
• Budjang Manis
• Timangis in Atayku (Tausug)
• Hati bay Janjiꞌnu
• Awn Ini Kalangan (Tausug)

 

3. Jumadin

Kahunitan aku ameneꞌ bang sai subay angandaꞌug ma duwangan magkakalang itu, si Jumadin atawa si Den Bisa?  Maitu ma Pilipin saliꞌ labi abantug ma buwatinaꞌan si Jumadin min si Den Bisa.  Yampa iya bahaꞌu magtagnaꞌ magkalang sogoꞌ aheka na kalanganna.  Alahang piꞌitu ni Pilipin si Den.  Maitu asal si Jumadin. Min Tabawan iya.  Favorite-ku kalanganna “Butas Kalnaꞌ Textmate.” Aniyaꞌ labi sangpūꞌ ngibu views-na ma youtube.  Itu saga kalanganna kaseheꞌ:

• Budjang Kamata
• Iklas Pangatayan
• Sulat
• Langkaw Janjiꞌ
• Tabawan Manisan
• Paleyang Kasilasa

2. Den Bisa

Abantug toꞌongan si Den Bisa maitu ma Pilipin sogoꞌ labi-labi ma Malaysia.  Ya sababanna, ataꞌu toꞌongan iya angalang.  Aniyaꞌ saga kalanganna rock nꞌ roll buwat kalangan, “Bagay“.  Angalang iya ma Sinama, Tausug, maka Malayu.  Aniyaꞌ kalanganna ma saga videoke players. Taꞌentomku ipalku bay angalang kalangan “Biraddali” ma kawin kami.  Pangannalku Tausug si Den Bisa sogoꞌ Sama tuwiꞌ iya.  Magsusun aku halam taꞌabutku concert-na ma Semporna bay Lepa Regatta Festival.  Aniyaꞌ labi dahatus ngibu views-na ma youtube ma dakayuꞌ kalangan.  Alasig bang angalang si Den Bisa.  Min Skyline.F.M. isab iya.  Sama Tabawan si Den Bisa. Maglahat iya ma Kota Kinabalu, Sabah.

Itu saga kalanganna:

• Igal Addat Bangsata
• Siksaꞌ Pangentoman
• Lampa-Lampa Pisang
• Kaꞌa Kalasahanku
• Ciki-Ciki Bung
• Singsing Bulawan
• Tagnaꞌ Pagkasilasa
• Mbal Du Pagsusunanku (Aheka giꞌ kalanganna saddī min itu)

1. Jenes

Halam agōn aniyaꞌ angatu magkalang ma si Jenes ma Top 10 itu.  Bang aku anilaw ma Sama Dilaut, Sama Deya, atawa Bajau Malaysia bang sai ya umbul dakayuꞌ ataꞌu angalang kalangan Sama? Si Jenes ya sambung sigām kamemon. Kinalasahan isab iya eꞌ bangsa Sama.  Aꞌa iya min Buliꞌ Kullul, min dambilaꞌ Siasi.  Bang aku amowa saga DVD Sama ni saga kauman kasamahan, agtūy aniyaꞌ angentom ma saga Tenes-Tenes si Jenes.  Ahunit piniha saga kalanganna ma Internet sogoꞌ aheka tēpna mareyom saga kauman Sama maingga-maingga ma Pilipin.
Kalu ka bilahi akale ma saga kalanganna ma internet, ya itu bay tapiha kami:

• Pangentoman
• Kissa-Kissa Bajau
• Lolay-Lolay
• Tenes-Tenes: Lꞌlla Saddi
• Tenes Palahan

Kalanganna saddī min itu:

• Sintak Taliyaga

Honorable Mentions:

MGM Boyz, A.G.

Kugunahanku tabangbi.

Bang aniyaꞌ pangitaꞌubi ma pasalan saga singer itu ya halam giꞌ tasulatku, mag-comment kam boꞌ aku makajari angangganap ma post itu.  Labi-labina bang aniyaꞌ tandaꞌbi sāꞌ.  Pahatiꞌunbi aku bang sai Top 10 Magkakalang Bangsa Sama bang ma kaꞌam. (Forum Post Kami: Sai Top 10 Magkakalang Bangsa Sama bang ma kaꞌam?)
Daꞌa takalipatun mag-share post itu ma facebook-bi maka ma twitter.