Pasalan Kawin Kami
Anuli-suli aku ma pasalan bay kawin kami. Aˈa min Sulu, 
hˈndaku sogoˈ maitu kami makapagˈndaˈ ma Davao. Pagˈndaˈ kami ma Davao, bilahi aku ma iya, sogoˈ ya mareyom atayku subay aku aubus graduate min college bo yampa aku bilahi kinawin. Sandalanku bayaˈ ma iya. Ma halam giˈ aku atapus graduate, angalingan aku ni mmaˈna bo supaya hatina tunang maka Si Ruth. Bay aku angalingan ni iya bang aku aubus graduate min college, makajari ba pakawin aku ni anakna, ya na si Ruth. Yukna “Aho!” Atilaw aku bang pila banghad anakna.
Ahalgaˈ banghad si ruth sabab graduate isab min college maka professional iya. Hatina nsaˈ giˈ aku makasōng. Ya sababan maghinang giˈ aku ma lahatku bang sangom, angiskul aku bang llaw. Nsaˈ aniya haliˈanku. Ya bayaˈku ma si ruth minsan aku maghinang, tipunku sīnku bo makasōng aku ni si Ruth. Graduate paˈin aku min college bay aku piˈitu ni Davao itu. Nsaˈ du atˈggol bay na aku makasōng.
Pagtˈkkaku min lahatku tudju aku bay ni Davao sabab itiyaˈ maitu si Ruth. Bay bowaku 
magbeyaˈ ni Sambuwangan ni inaˈ-mmaˈna. Angˈndeˈan sōng. Pagˈndeˈku sōng, mainaˈan mmaˈ si Ruth, sogoˈ iya pinahalgaˈ eˈna si Lemuel Kandero sabab iya ya usba. Sinambut aku eˈ sigam. Atˈggol-tˈggol tagad-kawin kami sabab magtantu bulan sabab eˈ alawak inaˈ-mmaˈku. Subay kabilahi’an magtaiˈ-anak si Ruth maitu isab inaˈ-mmaˈku. Magsukul ni Tuhan halam kami abaibad. Makalanjal kawin kami.
Bay piˈitu ni Davao magtaiˈ-anak si Ruth maka magtaiˈ-anakku isab min lahat kami. Pagkawin kami ya pandala si Ruth, mpat heka na. Panonku nnom heka na min danakan si Ruth maka kakaˈku lˈlla. Ya hˈlling pastor ya bay angawin kami, “Ya palsukuˈanku (hatina batu kawin ilu) daˈa na aku buwanin. Panabangku na ma kaˈa.” Ya bay pagkawin kami alami pasal aheka luruk. Ba
ng pagˈndaˈnu dayahan kami sogoˈ ma kawin kami aheka anabang ma kami. Halam kami amayad 
pagkakan kawin, sogoˈ ya saga bagay kami ya bay amowa.
Ya bay kawin kami aniya bay angigal kasiyakahan si Ruth. Aniya isab angulintang maka angitara saga danakanna. Ya tiningkuwang kami bay kami magpūn-pūn magtaiˈ-anak kami. Taˈabut tˈllu llaw magpoleˈan kami. Amoleˈ magtaiˈ-anak si Ruth ni Sambuwangan maka ni Sulu ati magtaiˈ-anakku amoleˈ ni lahat kami ati kami isab pehēˈ ni Manila. Ya itu katapusan ma kawin kami. Wassalam.
