Bay waktu jaman eꞌ aniya dakayuꞌ lumaꞌ. Jari mareyom lumaꞌ inān magkakan siga. Pagkakan paꞌin, angaꞌun na inaꞌ jari atimuk na siga mainaꞌan. Hinabu siga magkakan, aniyaꞌ dakayuꞌ ondeꞌ-ondeꞌ aggamā.
Paggamāna paꞌin, ahꞌlling inaꞌna ni iya, yuk-i, “amangan na ka,” sogoꞌ agamā na paꞌin anak-anak inān.
Ya sababan angkan aggammā ondeꞌ inān arikiꞌ-dikiꞌ du pagkakan ma iya. Apꞌddiꞌ sidda atay inaꞌna. Pagpꞌddiꞌ atay inaꞌna inān, nilubakan itu ni buliꞌ sikuna maka luwag. Na, ai lagi! Paglubak maka luwag, magtūy anuleret anak-anak e’.
Pagsuleretna ahꞌlling iya, “krut, krut, krut” maka heꞌna maglaksu-laksu.
Hatina, tahinang na kuyyaꞌ anak-anak inān. Mainaꞌan na paꞌin iya \maglaksu-laksu, jari nilinganan iya ni inaꞌna sinōꞌ pasekot.
Yuk inaꞌna, “Daiꞌ ka.”
Angalingan na paꞌin inaꞌ inān sagoꞌ mbal na bilahi anak-anak e’ pasekot sabab kabowa pꞌddiꞌ atayna ma inaꞌna ma sabab bay iya nilubakan angkan iya tahinang kuyyaꞌ na.
Puwas heꞌ magtuy iya pakuppa min lumaꞌ boꞌ palangi tudju ni bangkaw. Paglangi na tudju ni bangkaw, niꞌapas iya eꞌ inaꞌna maka mmaꞌna sagoꞌ mbal na toꞌod bilahi ondeꞌ-ondeꞌ inān amoleꞌ. Sakali, mahēꞌ na paꞌin iya maglaksu-laksu ma bangkaw. Magkrut-krut isab. Na minnēꞌ hatina tagnaꞌan ya angkan aniya kuyyaꞌ ilu.
Wassalam