Maglombaꞌ Kitam Amassa
Ma program itu amanduꞌ kami bang ai batang-sulat Sinama maka buwattingga suwalana. Sai-sai ataꞌu amassa makajari ameyaꞌ ma lombaꞌ.
Ataꞌu ka amassa Sinama? Kaseheꞌan ataꞌu sigām amassa Tagalog maka Anggales sagoꞌ kahunitan sigām amassa bahasa Sinama. Halam sigām biyaksa amassa. Angkan aniyaꞌ program kami itu Maglombaꞌ Kitam Amassa. Alasig saga aꞌa bang tasayu ni sigām mbal ahunit amassa Sinama bang aniyaꞌ praktisnu.
Ma program itu amanduꞌ kami bang ai batang-sulat Sinama maka buwattingga suwalana. Sai-sai ataꞌu amassa makajari ameyaꞌ ma lombaꞌ. Sumaꞌan asāꞌ pikilan saga aꞌa. Pangannal sigām, sai alꞌkkas min kamemon, ya angandaꞌug. Sagōꞌ mbal buwattēꞌ. Angandaꞌug ka bang ahāp suwalanu maka hurupannu, bang akulang atawa halam aniya sāꞌ, bang sarang-sarang du lꞌkkasnu, maka bang tasiguru eꞌ nu ataꞌu ka amassa.
Ma llaw program, sai-sai bilahi ameyaꞌ, makajari magregister. Aniyaꞌ saga sangpūꞌ kissa maka usulan. Makajari ka ameneꞌ dakayuꞌ. Ya itu saga saupama kissa min program tagnaꞌ: Si Mboꞌ Adam maka Si Mboꞌ Hawa, Si Daꞌud maka si Golayat, Lukuꞌ Itingan maka Kulamperaꞌ, Magkosog-kosogan Kuyyaꞌ maka saga Baliyu, Si Dahꞌkka maka si Dampāt.
Bang kaꞌa na nilinganan, pinabassa ka ma dahūꞌan saga duwa atawa tꞌllu maghuhukum bangsa Sama. Ahāp du isab saga daꞌugan ma program. Itu saga daꞌugan bay dahūꞌan: Buwas, saga DVD kalangan bangsa Sama, maka saga pattaꞌ map lahat, ₱200 sampay ₱500 min NCCC Supermarket.
Garaꞌ kami ma program itu latag kami saga kauman Sama. Aubus na kami magprogram ma kaseheꞌan kauman. Bꞌnnal koꞌ itu alasig kitam bang kitam ataꞌu amassa ma bahasatam!
Bang ka bilahi aniyaꞌ Maglombaꞌ Kitam Amassa ma kaumannu atawa aniyaꞌ panilawnu, makajari ka anilaw ma kami ma “Comments” ma deyo.
