FB Downloaded Pic of Bana Sailani. If you are aware of a higher resolution photo, please comment or message so that we can finish turning this post into a classroom educational poster for Sama school children.

Aꞌa Sisangat si Bana Sailani. Ya pagusaha asal kampungna, magdaing maka magtuhun tipay. Sisangat itu dakayuꞌ paglahatan saga Sama Dilaut mariyataꞌ tꞌbba 2km min Mꞌddas (Siasi). Arikiꞌ lagiꞌ si Bana ma waktu bonoꞌ Jipun (1942-1945). Pinalangi iya ma tahik eꞌ inaꞌna boꞌ iya pataꞌu supaya makalahi sigām bang binombahan kauman sigām. Aheya na si Bana waktu iya makaiskul ma Sisangat Elementary School. Boꞌ makaꞌapas ma umulna min duwa iya makapass ma dantahun. Ahekaꞌ onde-iskul min Sisangat akosog palangi. Dakayuꞌ sababna si Principal Hassan Han coach sigām. Asal akosog si Bana maka saga seheꞌna ondeꞌ-iskul min Sisangat sagōꞌ minsan lagiꞌ, boꞌ sigām makadaꞌug ma paglombaꞌ langi ma Pilipin maka ma luwasan lahat, subay sigam pinanduꞌan pahāp. Subay sigām magsangsāꞌ ma praktis maka ma training. Dakayuꞌ hinang sigām boꞌ pakosog paglangi sigām, pinalangi sigām eꞌ si Principal Hassan ma sowang min tꞌngngaꞌ Sisangat maka Jambangan. Pelang pababag tinundan eꞌ sigām! Bay ameyaꞌ si Bana Sailani ma saga lombaꞌ langi. Min duwa iya angandaꞌug ma regional competition. Ma 1949 bay iya ningāꞌ eꞌ si Sambiao Basanung dakayuꞌ maglalangi ma Olympic Games boꞌ iya binowa ni Manila magsakap maglombaꞌ ma Asian Games. Jari angandaꞌug isab iya ma Palarong Pambansa ma Legaspi, Bicol ma tahun 1952. Duwa aꞌa ya bay anabang ma si Bana boꞌ iya palanjal maglombaꞌ langi. Ya district supervisor iskulna si Sir Julio Barnes maka si Sir Miralam Tillah. Ma bulan March 1953 taꞌagaw eꞌ si Bana ya Philippine national record ma 1,500 meter freestyle min seheꞌna si Sambiao Basanung. Ma bulan December isab talangi eꞌna min duwa national record ma 400 meter freestyle. Iya ya dahū-dahū Filipino makalangi 400 meter freestyle mareyom 5 minute. Ma lomba inān dandꞌppa iya makarahū min 1st runner-up si Agapito Lozada. Ma tahun 1953 iya angandaꞌug Athlete of the Year min Philippine Sportswriter Association. Angandaꞌug isab iya Philippine Swimmer of the Year ma 1954 maka ma 1958. Si Bana Sailani isab ya dahū Muslim-Filipino ameyaꞌ ma Asian Games. Sangpūꞌ ka pitu umulna ya bay iya ameyaꞌ ma 1954 Asian Games. Bay iya angandaꞌug bronze medal ma 400 meter freestyle maka team-na min Pilipin bay makaꞌāꞌ bronze medal ma 200 meter freestyle relay. Bay isab iya ameyaꞌ ma Asian Games ma 1958 maka 1962. Ma 1958 team-na bay angandaꞌug silver medal ma 200 meter freestyle relay. Si Agapito Lozada, si Ulpiano Babol, maka si Dakula Arabani saga seheꞌna ma relay jari angandaꞌug isab si Bana bronze medal ma 400 meter maka ma 1500 meter freestyle event. Min tꞌllu si Bana bay mag-qualify ma Olympic Games (taꞌabut eꞌna ya lꞌkkas boꞌ iya makasōd.) Min duwa iya bay ameyaꞌ. Bay iya palangi ma 1956 Olympic ma Melbourne, Australia maka ma 1960 Olympic ma Rome, Italy. Duwa event-na, ya 400 meter freestyle maka 1500 meter freestyle. Ma 1960 aniyaꞌ Philippine record si Bana Sailani ma lombaꞌ 400, 800, maka 1500 meter freestyle. Taguna eꞌ si Bana kapandayanna maglangi angalappas aꞌa. Bay iya atulak min Sambuwangan boꞌ iya mag-vacation ni Siasi. Aniyaꞌ bay angalaruk timbak daing angkan atunuꞌ ati abuhaw kappal sigām ya niōnan Queen Helen. Maglangi na saga pasahero. Tatabang eꞌna ingga-ingga manusiyaꞌ tabowa eꞌna minsan iya bay takeket eꞌ kalitan. Mbal hal maglalangi si Bana sagōꞌ bay du isab iya pasōd magsundalu. Duwampūꞌ ka siyam tahun iya ma Philippine Air Force min 1963 ni 1992. Bay isab iya magpanduꞌ paglangi ma Makati Sports Club. Niranglay si Bana, “Buwaya” pasal kosogna palangi. Kahekaꞌan aꞌa Siasi angōnan iya Bapaꞌ Banana. Suntuꞌan ma Sama si Bana. Aniyaꞌ kapandayan kasamahan ya halam aniyaꞌ ma kaseheꞌan bangsa pasal kallumtam maka pagusahatam ma dilaut. Bang ka atuyuꞌ, bang ka maghinang, bang ka magsangsāꞌ makadaꞌug ka ma saga lombaꞌ maka sports kaseheꞌan. Makaꞌāꞌ ka daꞌugan ma barannu maka ma bangsanu. Makasōd ka ma Palarong Pambansa, ma Asian Games, minsan ma Olympic Games. Makaꞌndaꞌ ka saga lahat alawak min kaumannu. Kalu ka tahinang sundalu buwat si Bana. Kalu ka isab makalappas aꞌa min palkalaꞌ alaꞌat. Kalu kaꞌa tahinang suntuꞌan Sama pasunuꞌ. Itu kaseheꞌan Sama maglalangi ma Olympic:Tuburan Tamse, Parsons Nabiula, Jairulla Jaitulla. Project Kauman Sama Online (Sinama.org)

Ai tapah'llingbi pasal itu?